All you need is love!

15. janúar

Sun, 15 Jan 2012 21:50:00 GMT

Góða kvöldið

Af nógu er að taka því margt er er búið að gerast síðastliðna viku.

Á miðvikudaginn var söngvakeppni Samfés, sem er söngvakeppni félagsmiðstöðva. Þetta var eiginlega undan,- undankeppni því tvö lög héðan frá félagsmiðstöðinni Tý kepptu um að komast í aðalkeppni Norðurlands sem verður í Varmahlíð. Lagið Brostu vinur, sem er íslensk útgáfu lagsins Lay down með Emiliönu Torrini og fleirum vann. Þetta lag er mér mjög kært þar sem ég gerði íslenska textann. Nú vona ég auðvitað að krakkarnir sex komist alla leið í lokakeppnina fyrir sunnan.

Í 6. MÞÓ erum við að lesa bókina Mitt er þitt eftir Þorgrím Þráinsson í nestistímum. Bókin er sjálfstætt framhald bókarinnar Tár, bros og takkaskór sem við lásum fyrir jólin. Bæði mér og krökkunum finnst bókin ákaflega spennandi. Það kom því heldur kindarlegur svipur á liðið þegar Þorgrímur sjálfur mætti í tíma til okkar og spjallaði við krakkana um bókina, hvernig það er að vera rithöfundur og hvaðeina. Hann er á flakki um landið að halda fyrirlestra fyrir elstu bekki skólanna og mér fannst tilvalið að misnota aðstöðu mín og grípa hann inn í tíma til okkar.

Á föstudaginn skrapp ég suður í að keppa í Útsvari gegn Fljótsdalshéraði. Stílistinn minn ákvað að hafa svarfdælskt þema og því var ég merktur Þorsteini Svörfuði í bak og fyrir og það átti heldur betur eftir að koma sér vel í leiknum því litirnir í búningnum hentuðu ákaflega vel til að leika Alþingismenn. En keppnin var mjög jöfn og spennandi en endaði með sigri Austanmanna 80-74 og draumurinn því úti að sinni.

EM í handbolta hófst í dag og Ísland á fyrsta leik á morgun gegn Króatíu. Ég er spenntur.

M át

8. janúar

Sun, 08 Jan 2012 20:15:06 GMT

Jæja þá er loksins komið 2012, sem margir telja að muni vera síðasta ár okkar hérna á jörðinni, þar eð heimsendir á að koma 21. des í ár. Mayarnir sem spáðu þessu hafa verið mjög sannspáir hingað til, en ég vona að þeim skjátlist núna :)

Að mæta í vinnu 2. janúar var erfiðara en mig grunaði, þar eð ég var búinn að snúa sólarhringnum við. Reyndar hefur mér ekki ennþá tekist að sofna fyrir miðnætti á þessu ári, spurning hvort að ég hafi sofið hreinlega of mikið í jólafríinu...

Thierry Henry er kominn aftur til Arsenal á sex vikna lánssamningi. Mikið gleðst ég yfir því, enda er hann goðsögn hjá Arsenal, eins og styttan af honum fyrir utan Ashburton Grove gefur til kynna.

Ég skellti mér á fótboltaleik hjá Dalvík/Reyni í gær. Liðið er að keppa í Hleðslubikarnum sem er undirbúningsmót liðanna á Norðurlandi. D/R öttu kappi við KA 2, sem var aðallega skipað leikmönnum sem eru í öðrum flokki liðsins. Skemmst er frá því að segja að mínir menn unnu leikinn 5-0 og mjög sannfærandi. Markvörðurinn hjá KA-mönnum á alla mína samúð en hann átti stóran þátt í tveimur mörkum Dalvíkurbyggðunga.

Ég fór einnig í afmæli í gær, en hann Aron Óskars varð tvítugur strákurinn og hélt upp á það með pompi og prakt (hvað eru pomp og prakt?). Þetta var skemmtileg veisla með góðu fólki og stompið sem skyndilega spratt upp stendur vissulega upp úr.

Spurning dagsins: Hvað merkir íslenska orðið ylgja?

M át

Annáll ársins 2011

Sat, 31 Dec 2011 01:06:38 GMT

Jæja þá er komið að því! Enn ein áramótin! 2011 er að renna sitt skeið og allt fer á upphafsreit á ný. 2011 var ár mikilla breytinga hjá mér og ég held að þær séu langflestar til góðs.

Janúar. Árið hófst á því að ég var færður úr baðvörslunni í sundlauginni niður í skóla til að kenna 9. bekk á meðan Klemenz væri í fæðingarorlofi. Þetta var mjög spennandi tími hjá mér og ég vaknaði glaður á hverjum degi og fannst lífið dásamlegt og var þess fullviss að ég væri á réttri hillu í kennslunni (og ég held það staðfastlega ennþá). Eitt versta veður sem ég hef upplifað var 7. janúar en þá fór allur bærinn á kaf og erfitt að komast leiðar sinnar. Íslendingar kepptu á HM í handbolta og náðu flottum árangri þegar þeir enduðu í sjötta sæti. Ég hélt áfram í kennaranáminu á Akureyri og þjálfaði Gettu betur liðið mitt. Einnig var ég grimmur á skíðum í fjallinu í frábæru færi. Að lokum töpuðum við fyrir Garðabæ í Útsvari.

Febrúar. Í febrúar var komið að vettvangsnámi mínu í kennslufræðunum og fékk ég að fara í MA, gamla skólann minn. Það var frábært að rölta þarna um gangana aftur og fara í tíma. Maður fékk eiginlega nostalgíukast. MA gekk vel í Gettu betur, unnu Hvanneyri og FB og komust í sjónvarpið í fyrsta skipti síðan 2008. Ég fór suður með liðinu í sjónvarpið en liðið keppti gegn Kvennaskólanum og tapaði naumlega 27-24, en Kvennó áttu eftir að standa uppi sem sigurvegarar í keppninni. Ég fylgdist spenntur með gangi mála í Norður Afríku og mið-austurlöndum, þar sem kviknaði mikið ófriðarbál og vonandi að lýðræðisumbætur séu í vændum þar.

Mars. Enn og aftur tók ég við nýju starfi í skólanum. Nú tók ég við íslenskukennslu á unglingastigi af Margréti Laxdal sem fór í leyfi. Þetta þýddi að ég var hættur í baðvörslunni. 4. mars er dagur sem ég mun ekki gleyma, eða ég mun ekki gleyma því sem ég man af honum. Huldumaðurinn Albert Örn skaut upp kollinum. Handboltalið Dalvíkur lagði upp laupana. Í fyrsta skipti í langan tíma fór ég á sjó, en ég fór með skólaskipinu Dröfn og 9. bekk í smáferð. Ég tók þá ákvörðun að yfirgefa ættaróðalið Svarfaðarbraut 11 og flytja í leiguíbúð. Síðan tók ég við umsjón í 7. SK með Guðríði. Ég og Bryndís skelltum okkur saman á heimsmeistaramótið í Brús þar sem við unnum byrjendaflokkinn og fengum súkkulaði í verðlaun!

Apríl. Ég flutti í Bjarkarbraut 13 og er þar ennþá og líkar bara vel. Ég skilaði síðasta verkefninu mínu á háskólagöngunni og átti þá bara eftir að fara í nokkur próf til að fá kennsluréttindin. Ég fór í stjórn Dalvíkur/Reynis þar sem ég er ritari. Páskarnir komu og fóru og ég fékk ekki páskaegg! Heldur fékk ég páskafótbolta, hann var vonbrigði. Tinna og Máney eyddu páskadeginum hjá mér.

Maí. Ég tók síðasta prófið í háskólanum og náði því með stæl. Ég gladdist yfir því að Kanarífuglarnir flugu upp í ensku úrvalsdeildina á ný og ekki skemmdi fyrir að Helguson og félagar í QPR komust einnig upp og af því tilefni fékk ég áritaða Helguson treyju. Dalvík/Reynir hóf tímabilið í 2. deildinni. Vinir Sjonna sungu sig inn í hug og hjörtu landsmanna með laginu Coming Home í Eurovision. Ég fór með 10. bekk í óvissuferð og skemmti mér rosalega vel. Stjáni frændi lenti í alvarlegu vinnuslysi og var heppinn að sleppa lifandi. Hann er algjör hetja og ég dáist að því hvernig hann hefur unnið sig úr þessu.

Júní. Ég byrjaði í vinnuskólanum í síðasta skiptið! Sumarið ætlaði ekkert að láta sjá sig, veðrið var kalt og hráslagalegt. Fjör út með firði ferðin var snilld. Ég útskrifaðist sem kennari á afmælinu mínu þann 11. júní. Ég fékk loksins að vita hvað ég væri að fara að gera næsta vetur, en mér var úthlutað 6. bekk, eða árgangi 2000. Ég var ákaflega glaður með það enda var þetta bekkurinn sem ég var búinn að óska mér. Jónsmessuhelgina sá ég um kvöldvökur á Golfævintýrinu í Svarfaðardal.

Júlí. Loksins kom sumarveðrið! Ég nýtti sumarfríið mitt til hins ýtrasta og fór í sund og golf á hverjum degi. Ég keppti meira að segja á meistaramótinu í golfi og eftir á að hyggja hefði ég átt að láta það ógert. Ég fékk góða heimsókn þegar Kristín og Pétur heimsóttu mig á hringferð sinni um landið. Ég fylgdist áfram með mínu liði vinna hvern leikinn á fætur öðrum. Síðan keypti ég mér líka forláta svefnsófa og ísskáp og því var orðið ansi heimilislegt hjá mér. Bæjarvinnuferðalagið var í júlí og að þessu sinni var ferðinni heitið til Fjallabyggðar.

Ágúst. Verzlunarmannahelgina notaði ég til að hlaða batteríin fyrir komandi átök fyrir Fiskidaginn mikla. Ég gaf mér þó tíma til að skjótast á Þverá og grilla með heimilisfólkinu þar. Á miðvikudeginum fyrir Fiskidag héldum við vinir og Kristjáns heilmikla styrktarsamkomu fyrir hann. Skemmst er frá því að segja að hún var frábær í alla staði! 87 árgangurinn hittist síðan á fimmtudeginum í tilefni 10 ára fermingarafmælis og fór í ratleik og lazertag. Síðan hélt hópurinn á leik D/R og KF og ég endaði í útvarpslýsingu frá leiknum í viðtali við Dodda litla. Kristín og Pétur kíktu aftur á mig og eyddu Fiskidagshelginni með mér hérna. Ég lauk störfum sem verkstjóri vinnuskólans og hóf störf sem umsjónarkennari 6. bekkjar. Ernir félagi kom í heimsókn frá Danmörku og við eyddum saman góðum degi á Akureyri.

September. Það voru göngur í Svarfaðardal og ég eyddi skemmtilegu kvöldi á Þverá. Ég varði miklum tíma í það að kynnast krökkunum í bekknum mínum og ég mér finnst þau öll dásamleg. Við fórum í gönguferð upp að Skeiðsvatni á göngudeginum. Dalvík/Reynir endaði í 5. sæti 2. deildar og átti möguleika alveg fram í lokaumferðirnar á að komast upp. Við töpuðum fyrir Akranesi í Útsvari en komumst áfram sem stigahæsta tapliðið. GUNNI BALD!

Október. Ég fór með starfsmannafélaginu á 30 ára afmælistónleika Friðriks Ómars í Hofi. Ég lét loksins verða af því að fjárfesta í alvöru sjónvarpi, í staðinn fyrir tölvuskjáinn sem ég var með fyrir. Ég prófaði að mæta á blakæfingar og hafði þó nokkuð gaman af. Þemadagarnir í Dalvíkurskóla um fjölmenningu gengu mjög vel. Ég var með Þýskaland og var klæddur sem íbúi Bayern á Októberfest í einn dag. Íslendingar fengu Lars Lagerback sem þjálfara landsliðsins. Ég fékk hina árlegu flensu og kom þá í ljós hversu dásamlegir krakkarnir mínir eru. Þau bökuðu köku og möffins handa mér, færðu mér perlumottur og „láttur þér batna“ kort.

Nóvember. Við tóku stífar leikæfingar í 6. MÞÓ. Helgileikurinn var í okkar höndum og mér hafði verið sagt að hann væri það eina sem skipti máli í 6. bekk... ég held að það sé ekki alveg satt. Ég rölti um bæinn á degi jólamarkaða og keypti allskonar dót. Meðal annars Búddastyttu. Ég fór í smávægilega aðgerð líka í byrjun nóvember, en ég var búinn að fresta henni mjög lengi. Ég fór inn í stjórn Golfklúbbsins sem formaður mótanefndar svo það verður nóg að gera hjá manni næsta sumar. Þann 30. nóvember hefði afi orðið 100 ára gamall svo ég fór og setti friðarljós á leiðið hans.

Desember. Ég fylgdist með kvennalandsliðinu í handbolta gera góða hluti á HM í Brasilíu og fylgdist líka með bekknum mínum brillera í helgileiknum. Ég fór á tvenna tónleika í Hofi, annars vegar Sigurð Guðmundsson og Memfismafíuna og hins vegar Baggalút. Báðir tónleikar voru snilld! Góðverkadagurinn í Dalvíkurskóla var stórkostlegur. Ég fékk útrás fyrir skreytingarhæfileika mína þegar ég skreytti íbúðina og keypti risastórt jólatré. Ég og fleiri sáum um spurningakeppni eldra stigs og síðan sýndum við frábæra frammistöðu á litlu jólunum með því að syngja lagið „Hjálpum þeim“. Jólapopppunktur NFD Í Gullbrekku var líka algjör snilld. Þetta eru gull af mönnum sem ég vinn með. Jólin komu loksins og ég mér til mikillar undrunar fékk 16 pakka! Þetta hefur ekki gerst áður að ég fái svo marga. Frábært spilakvöld á Þverá á öðrum degi jóla þar sem við spiluðum Catan langt fram eftir nóttu. Síðan að venju var ég að selja flugelda fyrir björgunarsveitina og D/R. Síðast en ekki síst hélt ég bolta pub-quiz á Höfninni og mitt mat er að þetta hafi verið besta quizið mitt.

Að lokum óska ég þér velfarnaðar á næsta ári og þakka kærlega fyrir það sem er að líða.

28. desember

Wed, 28 Dec 2011 12:06:25 GMT

Góðan dag félagi Einar, og þið hin sem sjaldnast skiljið eftir ykkur spor.

Þá eru jólin gengin í garð og munu taka það sem eftir er af árinu og fyrstu dagana á því næsta. Ég er búinn að hafa það frekar náðugt þessi jólin, eftir að hafa misst mig gjörsamlega í skreytingum, bakstri (hehe), og keypt jólatré sem er stærra en ég, þá var ég orðinn býsna spenntur fyrir jólunum.

á Þorláksmessu gúffaði ég í mig skötu með bestu lyst og þetta var ein besta skata sem ég hef smakkað, hún var hvorki of sterk né of mild. Síðan fór ég að taka á móti jólakortum í skólanum, en það er áralöng hefð fyrir því að jólasveinar beri út jólakort á aðfangadag. Aðfangadagurinn sjálfur var mjög notalegur. Maður beið bæði eftir jólunum og brjálaða veðrinu sem átti að láta sjá sig og það kom svo sannarlega. Ég hef aldrei fengið eins marga pakka og í ár, eða 16 talsins!

Meðal þess sem ég fékk voru sokkar, vettlingar, bolur, Hjarta mannsins eftir Jón Kalmann, nammi, sleif og upptakara og svo eina fallega málaða mynd af snjókorni í ramma.

Jóladagur leið þannig að ég sat og las Ég man þig eftir Yrsu Sigurðardóttur og upplifði gamaldags myrkfælni. Síðan fór ég á Þverá í Skíðadal á annan í jólum og spilaði Catan með Degi, Bryndísi, Helgu og Óliver fram á nótt. Síðan nennti ég ómögulega að keyra heim svo ég eyddi nóttinni í herbergi E á Þverá, en öll herbergin eru merkt með bókstöfum af einhverjum ókunnum ástæðum.

Í kvöld fer ég svo að selja flugelda fyrir Björgunarsveitina og D/R og að sjálfsögðu hvet ég alla til þess að kaupa skoteldana af björgunarsveitunum.

Gleðilega hátíð

M át

22. desember

Thu, 22 Dec 2011 20:56:00 GMT

Jæja þá eru ekki nema tveir dagar í jólin Einar minn og allir hinir sem aldrei skilja eftir spor!

Litlu jólin í skólanum voru haldin nú 19. og 20. des. Eldra stigið fékk að fara í jólafrí að kvöldi þessi 19. en yngra stigið þurfti að mæta í skólann og þann 20. desember. Starfsfólk skólans var með ótrúlega magnað atriði, en við tokum lagið "Hjálpum þeim" sem varð mjög vinsælt um árið. Markmiðið var að koma krökkunum til að hlægja og ég held að óhætt sé að segja að það hafi tekist, en verri söngur hefur sjaldan heyrst í sal Dalvíkurskóla. Ég fékk línuna "Við fáum af því frétti að hungursneyð ógni heilli þjóð" og að sjálfsögðu fór ég niður á hnén og tók rokkópið. Á myndbandi sem var tekið af þessu kom því miður í ljós að þetta var ekki alveg eins kúl og ég hafði séð fyrir...

En litlu jólin hjá mínum bekk voru morguninn eftir og lauk þar með helgileikssýningum krakkanna og þau stóðu sig enn og aftur ótrúlega vel og gerðu kennarann sinn stoltan. Síðan var þetta hefðubundið eins og ég mundi það frá í gamla daga, gengið í kringum jólatré, jólasveinar gáfu jólapakka og borðað smákökur við kertaljós. Á eftir var svo hangikjötsveisla fyrir starfsfólk.

Seinna um daginn ætlaði ég heldur betur að ganga frá jólainnkaupunum og vera stikkfrír frá þessu öllu fyrir jólin, en ekki vildi betur til en svo að ég uppgötvaði á bílastæðinu í Bónus að ég hafði gleymt veskinu mínu eftir heima! Ég gerði svo aðra tilraun í gær og þá lukkaðist bestur til en áður :)

En ég er sumsé búinn að kaupa allar jólagjafir (á eftir að pakka nokkrum inn), skrifa jólakort og dreifa mestum hluta þeirra svo nú mega jólin bara fara að koma. Á morgun er bara skötuveisla, klipping og að taka á móti jólakortum í skólanum fyrir jólasveinana og svo er bara afslöppun við að hlusta á jólakveðjurnar :)

M át

17. desember

Sat, 17 Dec 2011 10:14:04 GMT

Úti er hætt að snjóa... í bili allavega. En veðurklúbburinn á Dalbæ, sem er áreiðanlegasta veðurheimildin mín sagði að það myndi snjóa lítið í seinni hluta desember en vindurinn yrði meiri.

Nú er slétt vika í jólin og ég er ekki almennilega búinn að átta mig á því ennþá. Ég á ennþá eftir að skreyta, skrifa jólakort, kaupa gjafir og pakka þeim inn og margt fleira. En sem betur fer er stressið ekki farið með mig ennþá.

Á fimmtudaginn var góðverkadagur í Dalvíkurskóla og fóru þá allir nemendur vítt og breytt um bæinn og gerðu góðverk. Sumir mokuðu snjó, aðrir gáfu kerti, piparkökur eða knús en það kom í hlut bekkjarins míns að syngja í fyrirtækjum. Það var mikið góðverk. Sumir voru glaðir með sönginn á meðan aðrir voru glaðir þegar við vorum búin, en það sem skipti máli var að allir voru glaðir :)

Í gær var svo spurningakeppni eldra stigs skólan og kom það í hlut mín, Klemenzar og Snorra Eldjárn að sjá um keppnina. Við vorum fyrst dressaðir sem vitringarnir þrír (við fengum lánaða helgileiksbúningana). En leikar fóru þannig að 10. bekkur sigraði 9. bekk örugglega í úrslitum. Það er blóðugt að vera búinn að hafa fyrir því að gera langar vísbendingaspurningar og svo nást þær í fyrstu. En þetta eru víst bara svona klárir krakkar (ég vil frekar trúa því en að spurningarnar hafi verið lélegar)

Í kvöld er jólapopppunktur hjá NFD og verður fundurinn í Gullbrekku... ég held að húsið heiti það allavega.

M át

14. desember

Wed, 14 Dec 2011 20:19:51 GMT

Góða kvöldið Einar og þið hin sem skiljið ekki eftir ykkur spor...

Jólin nálgast óðfluga og eftir aðeins tíu daga verð ég búinn að tæta upp pakkana mína og ef tími gefst til, skoða innihald þeirra.

Helgileikinn flutti bekkurinn minn í kirkjunni á aðventukvöldi 3. desember. Þetta gekk ljómandi vel hjá þeim og ég var svo stoltur þegar þau voru búin. Næsta sýning þeirra er á morgun á Dalbæ fyrir íbúana þar og síðan þrjár sýningar á litlu jólunum.

Við gerum meira í 6. MÞÓ en að æfa helgileikinn því við hittumst og máluðum piparkökur saman eina notalega kvöldstund. Það var flott mæting og gaman að hitta krakkana og fjölskyldur þeirra svona fyrir utan skólatímann.

Íslenska kvennalandsliðið í handbolta gerði fínustu hluti á HM í Brasilíu þrátt fyrir að detta út í 16 liða úrslitum. Lokaniðustaðan er 12. sæti og sigur á Svartfjallalandi og Þýskalandi er frábær árangur.

Um síðustu helgi fór ég á tvenna tónleika í Hofi. Á föstudeginum fór ég á Sigurð Guðmundsson og Memfismafíuna og það voru mjöööög flottir og fallegir tónleikar. Bragi Valdimar Skúlason er frábær textahöfundur og einn sá besti á Íslandi í dag. Eftir tónleikana keypti ég jólaplötuna þeirra á vínyl og lét árita hana. Reyndar stóð á henni "Til Magga" en Sigurður lagfærði það með því að setja Magga í fangelsi... Daginn eftir fór ég á Baggalút og það var sko veisla fyrir jólabarnið! Ekki skemmdi það heldur fyrir að Sigtryggur Baldursson dúkkaði upp og söng línu Röggu Gísla í Leppalúða. Síðan tók hann Rúdolf með Þeysurunum og Hýrasta jólatréð að sjálfsögðu.

Á morgun er góðverkadagur í Dalvíkurskóla og ég fer með allan bekkinn í fyrirtæki í bænum að syngja jólalög. Gaman gaman :)

M át

30. nóvember 1911

Wed, 30 Nov 2011 23:55:14 GMT

Fyrir sléttum 100 árum síðan kom Jón Pálmi Jóhannsson á Búrfelli í heiminn. Að því tilefni fór ég með friðarljós í boði Ásrúnar að leiði hans í kirkjugarðinum. Svarfaðardalurinn skartaði sínu fegursta í tilefni dagsins.

Af jólaskapi

Sun, 27 Nov 2011 13:57:21 GMT

Ég er kominn í jólaskap Einar, Ernir og þið hin rúmlega hundrað sem aldrei skiljið eftir ykkur neitt hérna!

Það stafar kannski af því að minn bekkur er að fara að flytja helgileikinn (ekki Baggalúts) heldur þennan hefðbundna og stífar æfingar hafa verið í ganga undanfarnar vikur og ná hámarki í næstu viku því fyrsta sýning er á aðventukvöldi í Dalvíkurkirkju klukkan 20:00 þann 4. des.

Í dag er fyrsti dagur í aðventu sem þýðir að ég get fengið útrás fyrir jólaskapið mitt án þess að pirra fólk, því ég held að flestir séu þeirrar skoðunar að menn megi fara að jólast þegar aðventan gengur í garð. Ég var einmitt rétt í þessu að henda aðventuljósinu mínu upp í glugga, en nágrannar mínir á efri hæðinni voru svo elskulegir að gefa mér eitt af sínum ljósum. Þvílíkir öðlingar :)

Í gær voru ýmsir jólamarkaðir hérna í Dalvíkurbyggð. Ég rölti um bæinn og skoðaði eitt og annað og keypti nokkra hluti. Sá hlutur sem ég er hrifnastur af er 15 cm stórt Búddalíkneski úr tré. Hann er svo glaður karlinn og lítur út fyrir að vera skellihlæjandi að maður fer ósjálfrátt í gott skap við að horfa á hann.

Þann 3. nóvember þurfti ég að fara í smávægilega aðgerð og ég ætla að nota hana sem afsökun fyrir letinni í mér að pára eitthvað hérna á síðunni, auk þess hef ég haft sáralítið til að skrifa um. Dagarnir eru hver öðrum líkari núna en það er alls ekki slæmt, því þeir eru líka hver öðrum skemmtilegri og nýjar áskoranir blasa við.

Á eftir verður aðalfundur GHD (Golfklúbbs Heiðars Davíðs, eins og einhver sagði :D ) og ef enginn mótmælir þá verð ég formaður mótanefndar. Mér skilst að þetta sé gríðarlega stórt og mikilvægt embætti, en að sama skapi stefnir í að ég hafi nógan tíma næsta sumar til að sinna því þar sem ég verð að gera sáralítið annað en að vera í sumarfríi :)

...

Sat, 19 Nov 2011 17:39:49 GMT

Sögusagnir af andláti mínu eru stórlega ýktar.

Af hrekkjavöku...

Sun, 30 Oct 2011 12:51:30 GMT

...Ég gerði ekki neitt í tilefni hrekkjavöku sem verður á morgun.

Hins vegar var ég í vetrarfríi um síðustu helgi og á mánudag og þriðjudag. Fríið fór ekki alveg eins og ég hafði planað en það lengdist aðeins hjá mér sökum veikinda. Ég fékk hita á þriðjudag og frá vinnu fram á föstudag. Þetta er styttri pesti en í fyrra svo ég er harla glaður með það. Krakkarnir mínir voru þó duglegir að hressa mig við og komu færandi hendi. Ég fékk fjöldan allan af perluðum Verum, köku, möffins, nammi, rós og fleira. Þau eru í einu orði yndisleg þessi börn :)

Arsenal er heldur betur að snúa við leiktíðinni hjá sér. Einn besti fótboltaleikur sem ég hef séð var í gær þegar Arsenal lagði Dynamo Chelski 3-5 á Stamford Bridge. Robin Van Tastic skoraði þrennu og er kominn með 27 mörk í síðustu 28 deildarleikjum! Næst er það leikur á þriðjudaginn við Marseille og ef hann vinnst er liðið komið langleiðina upp úr riðlinum.

Ingi og Tumi voru einnig í vetrarfríi í síðustu viku. Þeir komu í heimsókn og við brölluðum ýmislegt saman frændurnir, spiluðum, fórum í sund og hvaðeina. Tumi er orðinn svo mikill unglingur að það er æðislegt. Hann er kominn í band og spilar þar á bassa af miklum móð. Svo er hann með topp tónlistarsmekk líka ;)

Á eftir er ég á leiðinni í leikhús hérna á Dalvík með bekknum mínum. Addi Sím hefur verið að vinna ótrúlega flott starf með krökkum á unglingastigi í skólanum í að setja upp leikverk síðustu ár og það er eins nú. Ég hlakka mikið til að sjá þetta á eftir þar sem ég hef bara heyrt góða hluti um þetta.

M át

Af gráti og gnístran

Sun, 16 Oct 2011 11:03:35 GMT

Það er sunnudagsmorgun... og hver var aftur næsta lína í laginu sem Jón Ólafsson söng hérna um árið? Manstu það?

Íslendingar eru komnir með nýjan landsliðsþjálfara í knattspyrnu karla. Það er () góðkunni Lars Lagerbäck (fattaðiru grínið með ()?) og honum til aðstoðar og tannréttingar er tannlæknirinn góðkunni Heimir Hallgrímsson. Lars á víst að sjá um þjálfarahliðina á meðan Heimir heldur uppi stuði á blaðamannafundum, en að sögn fréttamanna var lítið um stuð á fundunum hjá Smiðnum góðkunna nema rétt á meðan hann var að bjóða fólki í nefið. En að öllu gríni slepptu þá held ég að þetta sé frábært fyrir íslenska knattspyrnu og aldrei að vita nema við förum inn á topp 100 á Coca Cola lista FIFA.

Í síðustu viku (sem var hreint ekkert svo síð) voru þemadagar í skólanum. Minn hópur fjallaði um Þýskaland og tóku þar á þeim hlutum sem við þekkjum um Þýskaland (bjór og Hitler). Ég var himinlifandi með verkefnið því ég hef komið tvisvar til Þýsklands og þetta er eitt af mínum uppáhaldslöndum. Við fjölluðum um helstu hátíðir, menningu, tónlist, íþróttir, stjórnarfar, sögu og allt hvað Eina(r) sem við kemur landinu. Einn veggur í stofunni var tileinkaður Evrópustríðinu 1914-1918 og W.W.II. og teiknuðu tveir piltar flennistóra mynd af Foringjanum sjálfum. Ég held að enginn hafi fengið hland fyrir hjartað þó að hann hafi verið þarna uppi á vegg. Sjálfur skartaði ég heimatilbúnum þjóðbúningi Bæjaralands sem samanstendur af grænum stuttbuxum, hvítri skyrtu, axlaböndum og furðulegum hatti. Ég jóðlaði ekki...

Johnny Cash, Bob Hope og Steve Jobs eru allir látnir. Now we got no Cash, no Hope and no Jobs.

M át

Hæ hæ og halló dagbók!

Sun, 09 Oct 2011 18:40:35 GMT

Ég er að hugsa um að halda mig við félaga Bert.

Snjórinn er kominn í Andabæ og í Dalvíkurbyggð líka, að minnsta kosti til fjalla. Hérna í bænum er þetta óttaleg slydda enda hiti fyrir ofan frostmark ennþá allavega. Það var svo mikil rigning í gær og aðfaranótt laugardagsins að ég man varla eftir öðru eins. Bjarkarbrauti, eða neðsti hluti hennar breyttist í Feneyjar svo mér leist illa á að keyra yfir risapollinn sem hafði myndast þar, en Runólfur er búinn að læra að synda svo hann skreiddist yfir þetta.

Mestur hluti af þeim pósti sem ég finn í græna póstkassanum mínum eru auglýsingar og dreifiblöð. Ég nenni sjaldanst að skoða þetta en eitthvað varð til þess að ég lét mig hafa að skoða Elko bækling. Og viti menn! Helduru að þar hafi ekki birst 32" tommu sjónvarp á viðráðanlegu verði! Ég ætla ekki að hljóma eins og einhver leim auglýsing en nú á ég þetta sjónvarp :) Svo nú þegar ég ligg í sófanum mínum og glápi á sjónvarpið þá þarf ég ekki að vera með kíki til að sjá hvað sé í gangi ;)

Ég fór í sakleysi mínu á blakæfingu á miðvikudaginn. Ég hélt að þetta væri eins og hver önnur blakæfing og það kom því flatt upp á mig að við vorum að fara að spila æfingaleik við Siglufjörð! Og ég hef ekki einu sinni spilað sex manna blak ennþá. En þetta var ofboðslega gaman og ég komst klakklaust að mestu í gegnum þetta :) Einar ég mæli með blakinu á mánudögum og miðvikudögum klukkan 20:00

Það eru þemadagar í Dalvíkurskóla í næstu viku. Þemað að þessu sinni er fjölmenning og verða tekin fyrir þau lönd sem nemendur skólans eiga rætur að rekja til. Ég er með Þýskaland og það er nú aldeilis fjölmargt sem hægt er að segja um Þýskaland (Hitler og bjór) svo þetta verkefni á eftir að vera spennandi.

Hæ hæ og halló dagbók!

Sun, 02 Oct 2011 12:18:52 GMT

Ef ég man rétt þá byrjuðu Dagbækur Berts alltaf á þessum haus. En Bert á sér tvífara... segjum ekki meira, en ég held að hinn dularfulli laumublogglesandi Klesmenz viti meira um málið.

Ég verð víst að sætta mig við það að vera slappur bloggari, en svona er þetta þegar dagarnir eru orðnir hverjum öðrum líkari og maður fastur í rútínunni sem felst í því að vera kominn í fasta vinnu og ekki lengur í skóla. GUNNI BALD!

Í gærkvöldi fór ég með starfsmannafélagi Dalvíkurbyggðar á 30 ára afmælistónleika Friðriks Ómars. Tónleikarnir, sem voru haldnir í Hofi (The HOF) voru hinir glæsilegustu. Hann söng þarna öll sín helstu lög úr Eurovision, ásamt lögum úr Elvissjóinu, Villa Vill og fleira. Auk þess komu gestir reglulega og sungu með honum eins og Guðrún Gunnars og Regína Ósk ásamt Jógvan og ættingjum hans og vinum. Ég allavega skemmti mér prýðilega og lét alveg vera að fara á stóðréttaball eins og nokkrir aðrir gerðu við heimkomuna. GUNNI BALD!

Á föstudaginn keppti ég í Útsvari gegn Akranesi. Við töpuðum 77-88 en erum eins og staðan er núna stigagæsta tapliðið og eigum prýðis góða möguleika á að komast áfram í 16 liða úrslit. Það væri þá ekki í fyrsta sinn sem við kæmumst áfram á þann hátt. En Reykjavíkurferðin var ágæt svosem, ég gisti á Cabin hótelinu við Borgartún og nýtti frítímann minn í að rölta um miðbæinn og reyna að læra að rata um hann, því landafræði Reykjavíkur er ekki mín sterkasta hlið. Ég kíkti í geisladiskabúðina hans Valda og fornbókabúðina hjá Braga sem kemur reglulega fyrir í Kiljunni. GUNNI BALD!

Flugið heim í gær var ekki eins skemmtilegt. Ég átti flug klukkan 8:45 en vegna háloftavinda frestaðist það til 11:15 og við vorum ekki lent fyrr en 12:15. Flugvélin bauð upp á rússíbanareið með tilheyrandi látum í nokkrum konum sem sátu framarlega í vélinni. Það var ekki til að róa taugarnar sem voru nokkuð þandar fyrir. En mér finnst gaman að fljúga og við komumst klakklaust niður svo allt er í góðu lagi. GUNNI BALD!

M át

Af sumarauka og kvefi

Sun, 18 Sep 2011 18:58:28 GMT

Sælir Einar og Ernir! Já, þú last rétt Einar minn því lesendur síðunnar eru orðnir tveir, alveg eins og hjá þér ;)

Knattspyrnusumrinu hjá Dalvík/Reyni lauk formlega í gærkvöldi með lokahófi sem hadlið var í Árskógi. Fyrr um daginn hafði liðið sigrað Fjarðabyggð sannfærandi 3-0 (Sorry Ernir) og endað í fimmta sæti deildarinnar sem er sama sæti og ég spáði fyrir um, en fimm sætum ofar en sérfræðingarnir spáðu í vor. Kristinn Þór Björnsson var valinn besti leikmaður sumarsins, Hilmar Daníelsson var sá efnilegasti og fyrirliðinn Hermann Albertsson var leikmaður Brúans.

Á föstudaginn var útivistardagur skólans, á degi íslenskrar náttúru, en sá dagur var haldinn hátíðlegur í fyrsta skipti núna. Þetta er afmælisdagur Ómars Þorfinns Ragnarssonar og dagurinn haldinn hátíðlegur til að heiðra hann. Ég, ásamt bekknum mínum gengum frá Koti, upp að Skeiðsvatni í prýðilegu veðri. Reyndar byrjaði að rigna um leið og við vorum komin upp að vatninu og byrjuð að borða nestið okkar, en svo stytti upp nánast um leið og við lögðum af stað niður eftir aftur. Strákarnir í bekknum skemmtu sér konunglega við að vaða í vatninu, en ég lét það ógert. Þetta var í annað skipti sem ég kem þarna uppeftir og ég verð að segja að í minningunni er vatnið stærra. Anna Lísa, húsfreyjan í Koti sagði okkur frá álagabletti sem er skammt frá bænum. Til að súmma þetta upp þá var ferðin ákaflega skemmtileg, 23 jákvæðir krakkar, þrír frábærir foreldrar með í för og einn nöldrandi Skapti :)

Á föstudagskvöldið var hausthristingur starfsfólks Grunnskóla Dalvíkurbyggðar. Ég var í skemmtinefndinni ásamt fríðu fólki og dagskráin var mjög skemmtileg. Við byrjuðum á að skipta stóra hópnum upp í nokkur lið og liðin fundu sér nafn og einkenni. Síðan var keppt í ýmsum greinum, svo sem Origami-gerð, Actionary og stígvélasparki. Mjög skemmtilegt kvöld og greinilegt að ég vinn á frábærum vinnustað. Ég vaknaði í gær alveg að drepast úr hálsbólgu og ég hélt að ég væri að fá hita í dag, en það hefur sloppið hingað til 7, 9, 13...

M át